ഇന്ധന നയത്തില് നിർണായക മാറ്റത്തിനൊരുങ്ങി കേന്ദ്ര സർക്കാർ. E85, E100 ഇന്ധനങ്ങളുടെ എന്നിവയുടെ ഉപയോഗത്തിന് വഴിയൊരുക്കുന്ന കരട് വിജ്ഞാപനം പുറത്തിറക്കി.പെട്രോളില് എഥനോള് കലർത്തുന്നത് വർദ്ധിപ്പിക്കുന്നതിനായി കേന്ദ്ര മോട്ടോർ വാഹന നിയമങ്ങളില് ഭേദഗതികള് നിർദ്ദേശിക്കുന്ന കരട് വിജ്ഞാപനമാണ് കേന്ദ്ര റോഡ് ഗതാഗത-ഹൈവേ മന്ത്രാലയം പുറപ്പെടുവിച്ചത്. നിലവില്, രാജ്യം വ്യാപകമായി E20 ഇന്ധനം ഉപയോഗിക്കുന്നുണ്ട്.
എഥനോള് കൂടുതലായി കലർത്തുന്നതിലൂടെ അസംസ്കൃത എണ്ണയെ ആശ്രയിക്കുന്നത് കുറയ്ക്കുകയാണ് സർക്കാർ ലക്ഷ്യമിടുന്നത്. E85 എന്നത് 85% എഥനോളും 15% പെട്രോളും ചേർന്നതാണ്. E100 എന്നത് ഏകദേശം ശുദ്ധമായ എഥനോള് ഇന്ധനമാണ്. ഫ്ലെക്സ് ഫ്യൂവല് വാഹനങ്ങളില് മാത്രമാകും ഈ ഇന്ധനം ഉപയോഗിക്കാൻ കഴിയുക. ബയോഡീസല് റഫറൻസുകള് B10 ല് നിന്ന് B100 ആയി വർദ്ധിപ്പിക്കാനും നിർദേശമുണ്ട്.
ഈ വർഷം ഡിസംബറോടെ ഇതിന്റെ ട്രയലുകള് ആരംഭിക്കാനാണ് സർക്കാർ ലക്ഷ്യമിടുന്നത്. കാറുകള് വാങ്ങുന്നവർക്ക്, നിർദ്ദിഷ്ട മാറ്റങ്ങള് ഉടനടി പ്രാബല്യത്തില് വരില്ല. കാരണം E20 ഇപ്പോഴും ഇന്ത്യയില് നിലവിലുള്ള മാനദണ്ഡമാണ്. എന്നിരുന്നാലും, ഭാവിയില് ഫ്ലെക്സ്-ഇന്ധന വാഹനങ്ങള് കൂടുതല് പ്രചാരത്തിലാകാനുള്ള സാധ്യതയാണ് ഈ വിജ്ഞാപനം സൂചിപ്പിക്കുന്നത്.
