മുംബൈ: ടി20 ലോകകപ്പിലെ മികച്ച പ്രകടനത്തിന് പിന്നാലെ സഞ്ജു സാംസൺ ഇന്ത്യൻ ഏകദിന ടീമിൽ ഇടംപിടിക്കുമെന്ന് പ്രതീക്ഷിച്ചിരുന്ന ആരാധകർക്ക് വീണ്ടും നിരാശ. അഫ്ഗാനിസ്ഥാനെതിരെയുള്ള വരാനിരിക്കുന്ന ഏകദിന പരമ്പരയ്ക്കുള്ള ടീമിൽ സഞ്ജുവിനെ പരിഗണിക്കാൻ സെലക്ഷൻ കമ്മിറ്റി തയ്യാറല്ലെന്നാണ് പുതിയ റിപ്പോർട്ടുകൾ. സഞ്ജുവിന് പകരം ഇടംകൈയ്യൻ ബാറ്റർ ഇഷാൻ കിഷനെ ബാക്കപ്പ് വിക്കറ്റ് കീപ്പറായി ടീമിലെടുക്കാനാണ് ബി.സി.സി.ഐ നീക്കം നടത്തുന്നത്. ഐ.പി.എല്ലിലും അന്താരാഷ്ട്ര ടി20 മത്സരങ്ങളിലും സഞ്ജു സ്ഥിരതയാർന്ന പ്രകടനം പുറത്തെടുക്കുമ്പോഴും ഏകദിന ഫോർമാറ്റിൽ സഞ്ജുവിനെ തൽക്കാലം മാറ്റിനിർത്താനാണ് സെലക്ടർമാരുടെ തീരുമാനം. ഇതോടെ സഞ്ജുവിൻ്റെ ഏകദിന ഭാവി വീണ്ടും അനിശ്ചിതത്വത്തിലായിരിക്കുകയാണ്
