തിരുവനന്തപുരം: രാഷ്ട്രപതി ദ്രൗപദി മുർമു നാല് ദിവസത്തെ സന്ദര്‍ശനത്തിനായി ചൊവ്വാഴ്ച കേരളത്തിലെത്തും.രാഷ്ട്രപതി ദ്രൗപദി മുർമുവിന്‍റെ കേരള സന്ദര്‍ശനത്തിനുള്ള ഒരുക്കങ്ങള്‍ പുരോഗമിക്കുന്നു. നാലുദിവസത്തെ സന്ദർശനത്തിനായി ഈ മാസം 21 -നാണ് രാഷ്ട്രപതി തിരുവനന്തപുരത്തെത്തുക. 22നാണ് ശബരിമല ദർശനം. വിപുലമായ തയ്യാറെടുപ്പുകളാണ് സന്നിധാനത്തും പമ്പയിലും ഇതോടനുബന്ധിച്ച് നടക്കുന്നത്. 23ന് രാവിലെ രാജ്ഭവൻ അങ്കണത്തിൽ മുന്‍ രാഷ്ട്രപതി കെ.ആർ. നാരായണന്‍റെ അർധകായ പ്രതിമ ശ്രീമതി മുര്‍മു അനാച്ഛാദനം ചെയ്യും. തുടര്‍ന്ന് ശിവഗിരിയിൽ നടക്കുന്ന ശ്രീനാരായണ ഗുരു മഹാസമാധി ശതാബ്ദിയില്‍ രാഷ്ട്രപതി മുഖ്യാതിഥിയാകും. പാലാ സെൻറ് തോമസ് കോളജിൽ നടക്കുന്ന പ്ലാറ്റിനം ജൂബിലി ആഘോഷങ്ങളിലും അന്നേ ദിവസം ശ്രീമതി മുര്‍മു പങ്കെടുക്കും. 24ന് എറണാകുളം സെൻറ് തെരേസാസ് കോളജിലെ ശതാബ്ദി ആഘോഷത്തിൽ പങ്കെടുത്തശേഷം വൈകുന്നേരത്തോടെ വ്യോമസേനയുടെ പ്രത്യേക വിമാനത്തിൽ രാഷ്ട്രപതി ന്യൂഡൽഹിക്ക് മടങ്ങും.
