ഒമാൻ തീരത്തിന് സമീപം ഹോർമുസ് കടലിടുക്കിലൂടെ സഞ്ചരിക്കുകയായിരുന്ന പാനമ പതാക ഘടിപ്പിച്ച ‘എംടി ഓൺ പീസ്’ എന്ന വാണിജ്യ കപ്പലിന് നേരെ പ്രൊജക്റ്റൈൽ പതിച്ച് പതിനൊന്ന് ഇന്ത്യൻ ജീവനക്കാർക്ക് പരിക്കേറ്റു. ആകെ 19 ജീവനക്കാരുണ്ടായിരുന്ന കപ്പലിൽ 17 പേരും ഇന്ത്യൻ പൗരന്മാരായിരുന്നു. ആക്രമണത്തിൽ ആകെ 12 പേർക്ക് പരിക്കേറ്റതിൽ 11 പേരും ഇന്ത്യക്കാരാണെന്ന് വിദേശകാര്യ മന്ത്രാലയം സ്ഥിരീകരിച്ചു. ഒമാൻ അധികൃതരുടെ അടിയന്തര സഹായത്തോടെ പരിക്കേറ്റ ജീവനക്കാരെ കപ്പലിൽ നിന്ന് ഒഴിപ്പിക്കുകയും ഒമാനിലെ ഖസബിലുള്ള ആശുപത്രിയിൽ പ്രവേശിപ്പിക്കുകയും ചെയ്തു.
സംഭവത്തെ ശക്തമായി അപലപിച്ച ഇന്ത്യൻ വിദേശകാര്യ മന്ത്രാലയം വാണിജ്യ കപ്പലുകൾക്ക് നേരെയുള്ള ആക്രമണങ്ങൾ ഉടനടി അവസാനിപ്പിക്കണമെന്ന് ആവശ്യപ്പെട്ടു. അന്താരാഷ്ട്ര സമുദ്രപാതകളിലൂടെയുള്ള ഗതാഗതവും വാണിജ്യവും എത്രയും വേഗം തടസ്സമില്ലാതെ പുനഃസ്ഥാപിക്കണമെന്ന് ഇന്ത്യ വ്യക്തമാക്കി. സമാധാനവും സ്ഥിരതയും നിലനിർത്താൻ ഇത്തരം നീക്കങ്ങൾ അവസാനിപ്പിക്കേണ്ടത് അത്യാവശ്യമാണ്. രക്ഷാപ്രവർത്തനങ്ങൾക്ക് വേഗത്തിൽ പിന്തുണ നൽകിയ ഒമാൻ ഭരണകൂടത്തിന് ഇന്ത്യൻ വിദേശകാര്യ മന്ത്രാലയം നന്ദി അറിയിച്ചു.
പരിക്കേറ്റ ഇന്ത്യൻ നാവികർക്ക് സാധ്യമായ എല്ലാ വൈദ്യസഹായവും ഉറപ്പാക്കാൻ ഇന്ത്യൻ നയതന്ത്ര കാര്യാലയം നടപടികൾ സ്വീകരിച്ചിട്ടുണ്ട്. മേഖലയിലെ സംഘർഷാവസ്ഥയെ തുടർന്ന് കപ്പലുകൾക്ക് നേരെയുണ്ടാകുന്ന തുടർച്ചയായ ആക്രമണങ്ങൾ സമുദ്ര മേഖലയിൽ വലിയ ആശങ്കയ്ക്ക് ഇടയാക്കിയിട്ടുണ്ട്. അന്താരാഷ്ട്ര സമുദ്രപാതകളിൽ യാത്ര ചെയ്യുന്ന നാവികരുടെയും സാധാരണക്കാരുടെയും സുരക്ഷ ഉറപ്പാക്കാൻ അന്താരാഷ്ട്ര സമൂഹം ഇടപെടണമെന്ന് ആവശ്യമുയർന്നിട്ടുണ്ട്. സമുദ്ര സുരക്ഷ ശക്തിപ്പെടുത്തുന്നതിനായി അയൽരാജ്യങ്ങളുമായി ചേർന്ന് ഇന്ത്യ സ്ഥിതിഗതികൾ സൂക്ഷ്മമായി നിരീക്ഷിച്ചു വരികയാണ്.
